Chasa-Dieu: Las tapissariás delh còr

Las tapissariás son expausadas en lo Còr daus monges, en l’emplaçament per aquelh son estadas faitas. Classadas « Monument istoric » en 1844, son avora la proprietat de la comuna de La Chasa-Dieu.

Òm sap que las tapissariás delh Còr de l’abadiá de La Chasa-Dieu seguèran comandadas per l’abat Jacques de Saint-Nectaire, e teissudas entre 1501 e abrial de 1518.

Son faitas de lana, de fials de seda, e de fials d’aur.

Un obrador inconeissut

Òm sap pas a quen obrador attribuèran la realizacion. Òm pensa que s’agís d’un obrador flamenc. D’aquelh temps, los obradors d’Airàs (fr. Arras), de Brussèlas o de Tornai èran los solets a èsser pro bèls per realizar una òbra d’aquelas dimension e qualitat.

Una colleccion completa

La  colleccion compta 14 tapissariás.
- Las doas que  representan la Nativitat e la Resureccion apartenon pas à la seguèla delh Còr e son avora presentadas en  la sala delh Tresaur.
- Las dotze autras forman una seguèla completa : lo cicle liturgic i es presentat dins sa totalitat, de l’Anonciacion çais lo Jutjament darrièr.

Un inventari de davant la Revolucion parla de 18 tapissariás, doncas 4 an dispareissut ; apartenián pas a la seguèla delh Còr qu’ela es completa.
Aquelas tapissariás èran expausadas mas per las fèstas liturgicas màgers. Èran envertolhadas e conservadas en la Tor Clementina pendent los tresboles de las guèrras religiosas o aqueles de la Revolucion francesa.