La mòrt èra particularament presenta elh sègle XV. A causa de las pèstas e de las guèrras, Euròpa perdèt la meitat de sa populacion entre 1350 e 1450. La Glèisa catolica fasiá de la preparacion a la mòrt un subjècte de reflexion fèrme important. L’art d’aquelh temps o marca ben, coma los juòcs scenics dins las glèisas, las pinturas amais las esculpturas.
Lo tèma de la dança macabra es de mostrar l’egalitat de totas e totes fàcia a la mòrt, amais son inexorabilitat. Aquelh tèma es illustrat per de personatges esqueletics tiran vas la mòrt los poissants d’aqueste monde amais d'òmes delh pòple, los religiós mais los laïcs.
Vès la Chasa-Dieu, los mòrts son pas d’esquelèts, mas son de còs transis ambe la pèl sobre las òssas. Aqueles mòrts dançan e fan fòrça facecias. Los vius, eles, son 24 en tres panèls, los poissants, los borgés, e lo pòple.
La pintura s’esbandís sobre 3 panèls e 4 pilars. Sobre los pilars, s’agís d’una pintura secha, faita sobre la pèira. L’abséncia d’endut explica sa cròia conservacion. Sobre los panèls, s’agís d’una pintura sobre endut, una fresca.
Aquela pintura es de mau datar. Òm pensa que seguèt realizada aus environs de 1450, mas coneisson pas l’autor, de retòchas son estadas faitas dempuèi.
A prepaus delh caractèr incomplet, d’unes pensan que l’òbra patiguèt de degradacions faitas apuèi, mas d’autres afortisson elh contrari, que l’artista la vouguèt laissada inachabada.
Los personatges pintrats en las danças macabras sont ateirats dins un òrdre pro convencional, lo de las ierarchias socialas d’aquelh temps, ambe alternància de religiós e de laïcs, e quasi pas de femnas.
Promièr panèl : los poissants
lo papa / l’emperaire / lo cardinal legat / lo rei / lo cardinal / lo conestable / l’abat mitrat / lo chavalièr
Segond panèl : los borgés
personatge panat / lo benedictin / lo jòine borgés / la chanongessa / lo marchand / la monja benedictina / lo sergent / lo chartrós
Tresen panèl : lo pòple
l’amorós / lo fraire infirmièr / lo mesnestral / lo teologian / lo païsan / lo cistercian / l’enfant / lo fraire lai